推銷大灣區一般嘅英國移民改革，難咗又易咗？
剛公布嘅英國移民政策改革，好多朋友嘅著眼點都放响T1 Startup同T1 Innovator。反複睇咗個草案兩三次，我覺得大家應該先了解下英國政府推行呢兩個，全新嘅居留簽證背後嘅理念係咩？到底乜嘢係對自己有利，而難度變化又响邊度？對某啲朋友可能覺得難咗，但對一啲人何嘗唔係滿足幾個願望嘅出奇蛋？都係講創新，可行性同發展潛力（innovation, viability and scalability）咁啊嘅口號，揀好呢？
其實今次嘅改革，門檻表面上的確調到好低。T1 Startup 係無投資額要求（T1 Innovator係5萬鎊），亦唔需要任何經驗，無一定要响指定嘅英國院校畢業，仲可以比兩年時間申請人試下自己個Business Plan（雖然唔計入5 year route居留時間裡面）。但到轉到T1 Innovator嘅時候，業務投資額都連嗰5萬鎊都豁免。坦白講，呢個門檻對於好多車未上到，「困」响香港呢個無乜「夢想」可以講，亦好難創業機會嘅年青人，同樣都係一條大膽嘅出路。呢個睇黎正正係英國政府，推呢個改革其中一個深層用意。
簡單啲講，就係想用一個低嘅門檻，然後用高嘅審查標準去吸納國際人材。當了解到當中嘅審核準則，就知英國政府唔想要死實實嘅舊式生意嘅錢，而係要啲人材嘅生意或者創業頭腦，去發展唔同嘅經濟效益同就業。英語水平要求係提高到B2，但係有英文教授嘅大學學位，有機會豁免。兩個簽證嘅Business Plan都係要指定嘅Endorsing Body（暫時未公布，但一定包括啲大學、創科基金公司同商界）認可。佢地仲會响T1 Innovator成功申請後第6、12同24個月去評估個業務係咪正常運作。
而重點就係响續簽證嘅要求，申請人嘅業務要滿足幾個要求之中嘅兩個，包括投資額（5五萬鎊），客戶數量增長，營業額，聘請本地員工數量之類。係咪難？唔否認一定係比從前難！不過，只要細心諗下，就會覺得其實結果嘅總支出，可能同之前差唔多。最大嘅分別係咩？依家唔只係要真係營運，仲要用腦同用心有火咁做！
Comments