可能有人覺得英國嘅教育好自由開放無壓力，咁未免太天真。事實上英國嘅怪獸家長，癲起上黎，絕對可以同香港嗰啲比，甚至有過之而無不及。但身處其中細心留意，會發覺英式怪獸同港式係有本質上嘅分別。無論係英國或者香港，怪獸家長嘅理由，當然緊係嗰句「為咗個小朋友好」台詞，但分別就係在於呢句嘢當中嘅含意。
香港所謂嘅「為佢好」，不外乎係為贏响嗰一大條「起跑線」，同埋複製嗰啲來來去去一樣嘅「人生規劃」。而英國嗰啲係點，先講講例子。接觸其它家長最多嘅時間，當然係接放學前嘅閒談。明明已經係讀private school，唔好話運動場泳池之類嘅大路嘢，連話劇級舞台同體操室都有齊。有兩三個家長係都要趕頭趕命，帶啲五歲人仔再去學話劇或者體操。普通興趣班話唔鐘意，要揸個幾鐘揾啲國家體操隊，職業話劇演員教咁癲。
原因緊係一樣係為自己嘅細路好，學體操就因為屋企基因比較矮小同粗壯，想個女嘅身形好啲。而學話劇嗰個，原因係個女嘅表達能力比較慢同性格怕羞，想改變下。呢啲「為小朋友好囉」嘅原因，係咪同香港嗰啲有分別呢？幾咁度身訂造？當中有無為將來入神料，揾大錢嘅「前途」考慮？
其實仲有一個好大嘅分別，我從來無聽過嗰英國怪獸，會創作一套共同嘅心法出黎去互相交流，然後加多句：「點解你個小朋友唔學呀？」講到底，大家都明白咩係因才施教，知道每隻怪獸嘅癲法都唔同，絕招都唔同。
Comentários