可能幾實用，但係或者幾悶，適合新手上路
有啲國家攞居留權相對容易，入籍就難過上火星（例如泰國同日本）。而英國嘅政策就先要得到居留簽證（Residence Visa），經過指定嘅居留時間同其它要求就可以申請永久居留權（Indefinite Leave to Remain (IRL)），然後住滿一年考埋The Life in the UK Test就申請入籍成為正式英國公民。所以對於大部份香港人，如果想移民英國，响現時嘅制度下，攞到居留簽證係第一亦係最重要嘅一步，今次希望用最簡單去分享基本嘅概念，令大家知自己可以或者能夠申請咩類別，而唔再比啲agent中介「塞」啲所謂Plan比大家。因為每種居留簽證嘅批核、要求、攞IRL嘅居住年期、需要續簽與否都唔同，所以詳細內容，會放响下面舊文傳送門。
申請英國居留簽證之前，當然要知自己或者配偶用緊嘅係咩Passport。如果自己或者配偶持有英國公民護照的話，即係居英權或者其它原因係英國公民（唔係BNO嘅英籍）。可以直接申請Settlement/Spouse Visa，要留意自己同配偶、十八歲以下嘅仔女嘅居留時間係一樣，係無太空人呢樣嘢。如果係持有特區護照或者BNO，可以達至入籍嘅居留簽證選擇大概分四類，Tier 1，Tier 2 Working Visa，Business Representative Visa（同唔希望亦唔想分享嘅難民申請）。直到今日黎講（遲啲唔知），响申請英國嘅居留簽證嘅要求或者地位，暫時特區護照同BNO係無明顯分別。呢個係Home Office政策實況，無興趣亦唔想爭拗BNO身份嘅問題（唔該！）。
大家可能响香港啲Agent中介口中，話什麼T1投資移民英國，其實呢個講法係錯到盡頭嘅。因為Tier 1係一個總類別，裡面係細分四個完全唔同要求同概念嘅居留簽證。當中包括T1 Investor、T1 Startup、T1 Innovator同T1 Exceptional Talent四種Visa。T1 Investor亦即係真正嘅投資移民（買護照？！），買指定嘅基金或者投資產品至少二百萬鎊（數額越大，入籍時間越快）。咁T1 Exceptional Talent睇名就知係比响體育、藝術、科研、演藝之如此類，有所成就同認受人士申請，呢個唔一定對香港人係遙不可及，成就同出色係指定機構決定，而唔係你或者我呢啲凡夫俗子去衡量。
T1 Startup同Innovator就係今年取代舊有香港人常用嘅T1 Entrepreneur嘅全新改革版，分別比無做生意經驗嘅創業人士同已經有營商背景嘅人申請嘅。近期好多香港中介Agent因為唔熟悉新制，所以大家都會聽到Business Representative Visa 呢樣嘢。呢個簽證並唔係什麼新東西，概念好簡單，就係一間响外國營運咗一段時間嘅公司，派一個員工或者小股東去發展英國市場，所以呢個員工需要居留簽證。
最後一種（唔計難民申請）嘅居留簽證，就係工作簽證（Tier 2 Working Visa）。現時，所有（除咗EU國民）希望去英國工作嘅人，都要先揾到每年國家需求嘅工種，達到指定年薪，然後僱主要有T2牌照，先可以申請T2 Working Visa（即係難到癲）。本來政府已經公布全新嘅技術移民改革，準備脫歐後實行，脫歐依家都唔知點，所以新制度未實行，現有制度不變直至脫歐為止（如果脫的話...）。
雖然英國嘅移民政策種類偏向簡單，但係總唔係好似坊間咁講到得一兩個選項。希望大家睇完，會有一個較清晰嘅概念，至少知道邊一兩或者更多種可能有機會。
###########################
個別居留簽證詳細資料舊文傳送門s：
英國公民（包括居英權一二代）申請家庭團聚 http://bit.ly/2QsTguz 現行Tier 2 Working Visa的難度 http://bit.ly/2W7MmRp 英國技術移民重大改革 http://bit.ly/2HDs4Gt T1 Startup與Innovator完整概念 http://bit.ly/2Wt401e 成功申請T1 Startup劇透 http://bit.ly/2YRQrpS 咩係Business Representative Visa？ http://bit.ly/30PimIS T1 Investor https://www.gov.uk/tier-1-investor Exceptional Talent Visa https://www.gov.uk/tier-1-exceptional-talent ###########################
Comments